Shadan Indauri
ehsas-e-gham men aaj vo yuun jalva-gar hua
rah rah ke mujh ko dil pe guman-e-nazar hua
itna qarib ho ke koi jalva-gar hua
ye bhi ḳhabar nahin ki main kab be-ḳhabar hua
guzra hai yuun zamane se begana ho ke ishq
gham ka asar hua na ḳhushi ka asar hua
mere qafas tak aa na saka koi inqalab
mujh ko to aaj tak na gham-e-bal-o-par hua
manzil ne chiḳh kar vahin avaz di mujhe
afsurda jis jagah mira azm-e-safar hua
un ki nazar na mere gareban se haT saki
divana ho ke aaj main divana-gar hua
kaisi shikast-e-dil thi ki ik ik sada ke ba.ad
ek ik hijab uTha ke koi jalva-gar hua
Leave a Reply