Ehsas-E-Gham Mein Aaj Wo Yun Jalwa-Gar Hua

ehsās-e-ġham meñ aaj vo yuuñ jalva-gar huā

rah rah ke mujh ko dil pe gumān-e-nazar huā

itnā qarīb ho ke koī jalva-gar huā

ye bhī ḳhabar nahīñ ki maiñ kab be-ḳhabar huā

guzrā hai yuuñ zamāne se begāna ho ke ishq

ġham kā asar huā na ḳhushī kā asar huā

mere qafas tak aa na sakā koī inqalāb

mujh ko to aaj tak na ġham-e-bāl-o-par huā

manzil ne chīḳh kar vahīñ āvāz dī mujhe

afsurda jis jagah mirā azm-e-safar huā

un kī nazar na mere garebāñ se haT sakī

dīvāna ho ke aaj maiñ dīvāna-gar huā

kaisī shikast-e-dil thī ki ik ik sadā ke ba.ad

ek ik hijāb uThā ke koī jalva-gar huā

Leave a Comment