Zamana DhunD Raha Tha Kidhar Gaya Pani

zamāna DhūñD rahā thā kidhar gayā paanī

kisī kā hukm huā to Thahar gayā paanī

vo dhuup thī ki zamīñ jal ke raakh ho jaatī

baras ke ab ke baḌā kaam kar gayā paanī

baḌā ġhurūr thā apnī chamak-damak pe use

sunār ne jo tapāyā utar gayā paanī

ḳhudā kā ḳhauf nahīñ ab tumhāre zehnoñ meñ

tavahhumāt kā is tarah bhar gayā paanī

shikast-ḳhurda ye qaumeñ tumheñ miTā deñgī

agar tumhārī hamiyyat kā mar gayā paanī

taras na aayā ġharīboñ ke haal par ‘ājiz’

sisakte paudoñ ke sar se guzar gayā paanī

Leave a Comment