aa.ina toḌ de riha kar de
bevafa ik yahi vafa kar de
rishta-e-dard toḌ de dil se
rang ko phuul se juda kar de
zindagi-bhar tujhi ko chaha hai
qarz kuchh to mira ada kar de
de raha hai zakat-e-husn agar
mire haq se zara baḌha kar de
muddaten ho ga.iin tujhe dekhe
ab to milne ka silsila kar de
phir koi gul khile sar-e-mizhgan
phir dar-e-ḳhvab koi va kar de
ik sitare ko baḳhsh kar mire ḳhvab
phir use mera aa.ina kar de
baiThta ja raha hai jaan ka ghubar
ab use mujh se mavara kar de
ai faqir-e-dayar-e-laili-jan
mire haq men bhi kuchh dua kar de
Leave a Reply