Muztar Khairabadi
mohabbat kar ke lakhon ranj jhele bekali paa.i
vo mujh ko kya mile ik maut goya jite-ji paa.i
vo bulbul huun ki jis din se luTa hai ashiyan mera
uTha laaya main apna dil samajh kar jo kali paa.i
shikayat us ki kya tujh se ye apni apni qismat hai
ki meri aankh ko aansu mile tu ne hansi paa.i
jahan men vaqa.i ‘muztar’ ka bhi ik dam ghanimat tha
magar afsos thoḌe din jiya kam zindagi paa.i
Leave a Reply