na.e zamane men ab ye kamal hone laga
ki qatl kar ke bhi qatil nihal hone laga
miri tabahi ka baa.is jo hai zamane se
usi ko ab mira kaahe ḳhayal hone laga
hava-e-ishq ne bhi gul khila.e hain kya kya
jo mera haal tha vo tera haal hone laga
shab-e-firaq vo kaisa tha jashn yadon ka
ki jis ka zikr bhi bad-e-visal hone laga
jo ranj-o-gham men mire saath saath tha ab tak
use bhi meri ḳhushi se malal hone laga
jahan pe manzar-e-jalva tha sirf vahm o guman
vahin pe jalsa-e-zohra-jamal hone laga
tumhare qadr se agar baḌh rahi ho parchha.in
samajh lo dhuup ka vaqt-e-zaval hone laga
na ḳhud ko becha na koi ḳhushamaden ki hain
to kaise tum pe ye ‘bekal’ saval hone laga
Leave a Reply