tanha apni zaat liye phirta huun main
ḳhud ko apne saath liye phirta huun main
lafzon ka sailab unDelun ḳhaak yahan
nannhi si ik baat liye phirta huun main
baḌi baḌi divaren kaise toḌunga!!
chhoTe chhoTe haath liye phirta huun main
hari bhari belon ka qissa kya likkhun
sukhe sukhe paat liye phirta huun main
‘suraj’ apne dil ki ujḌi basti men
yadon ki barat liye phirta huun main
Leave a Reply