Saleem Betab
fikr ka sabza mila jazbat ki kaa.i mili
zehn ke talab par kya naqsh-ara.i mili
mutma.in hota kahan mera dil-e-jalvat-pasand
darmiyan-e-shahr bhi jangal si tanha.i mili
dekhne men duur se vo kis qadar saada laga
paas se dekha to us men kitni gahra.i mili
har daricha mere istiqbal ko va ho gaya
ajnabi galiyon men bhi mujh ko shanasa.i mili
jab bhi habs-e-shahr se nikle to har ik raah par
mehrban ahbab ki manind purva.i mili
is se baḌh kar aur kya hota safar ka iḳhtitam
Dubte suraj se har manzar ko ra.ana.i mili
rabton ki vus.aten harja.i-pan samjhi ga.iin
ham ko ai ‘betab’ shohrat se bhi rusva.i mili
Leave a Reply