Aziz Qaisi
dil-ḳhastagan men dard ka aazar koi to aa.e
patthar se mere ḳhvab ka paikar koi to aa.e
dariya bhi ho to kaise Dubo den zamin ko
palkon ke paar gham ka samundar koi to aa.e
chaukhaT se haal puchha to bazar se suna
ik din gharib-ḳhane ke andar koi to aa.e
jo zaḳhm doston ne diye hain vo chhup to jaa.en
par dushmanon ki samt se patthar koi to aa.e
hain nauhagar hazar sana-ḳhvan hazar hain
mere siva.e tiir ki zad par koi to aa.e
lakhon jab aa ke ja chuke kya mil gaya miyan
ab bhi ye sochte ho payambar koi to aa.e
shikva durust ‘qaisi’ ke paiham sukut ka
lekin is anjuman men suḳhnavar koi to aa.e
Leave a Reply