dil-ruba bhi vo dil-navaz bhi hai
aur phir sab se be-niyaz bhi hai
ruh-farsa hai soz-e-ishq magar
mujh se puchho to jan-navaz bhi hai
shikva-e-daur-e-asman hi nahin
apni qismat pe mujh ko naaz bhi hai
kya tamasha hai mahfil-e-hasti
ik haqiqat bhi hai majaz bhi hai
jo ḳhuda se bhi kah nahin sakta
mere dil men nihan vo raaz bhi hai
kaun puchhe ki hazrat-e-‘simab’
aap vaqif hain koi ‘raz’ bhi hai
Leave a Reply