Alqama Shibli
zindagi se miri is tarah mulaqat hui
lab hile aankh mili aur na koi baat hui
dard ki dhuup nahin yaad ka saaya bhi nahin
ab to qismat meri be-rangi-e-halat hui
sirf kal hi nahin is daur men bhi dida-vari
nazr-e-auham hui said-e-rivayat hui
kal to mehvar the miri zaat ke ye kaun-o-makan
ka.enat aaj jo simTi to miri zaat hui
sar ko phoḌa kiye patthar se samundar se laḌe
sub.h yuun shaam hui shaam se yuun raat hui
ghar mira dekh liya sail-e-bala ne ‘shibli’
agahi kya hui ik dard ki saughat hui
Leave a Reply