Main Aise moD Par Apni Kahani chhoD Aaya Hun

maiñ aise moḌ par apnī kahānī chhoḌ aayā huuñ

kisī kī aañkh meñ paanī hī paanī chhoḌ aayā huuñ

abhī to us se milne kā bahāna aur karnā hai

abhī to us ke kamre meñ nishānī chhoḌ aayā huuñ

bas itnā soch kar hī mujh ko apne paas tum rakh lo

tumhāre vāste maiñ hukmarānī chhoḌ aayā huuñ

isī ḳhātir mire chāroñ taraf phailā hai sannāTā

kahīñ maiñ apne lafzoñ ke ma.ānī chhoḌ aayā huuñ

‘nadīm’ is gardish-e-aflāk ko maiñ chaak samjhā to

vahāñ par zindagī apnī banānī chhoḌ aayā huuñ

Leave a Comment