Poet
rivaj-o-rasm ka us ko hunar bhi aata hai
mujhe bulata bhi hai mere ghar bhi aata hai
badan ka husn damakta hai raat andhere men
ik aftab-e-sahar be-sahar bhi aata hai
juda.iyon men faqat ghar se duriyan to nahin
firaq surat-e-divar-o-dar bhi aata hai
mohabbaton men ghula jism yaad hai mujh ko
kabhi raqib mira mere ghar bhi aata hai
tire ḳhayal men tere jamal ka partav
misal-e-mauj bhi misl-e-guhar bhi aata hai
faqat ḳhulus men shiddat ki baat hai ya.ani
maqam dil men hai aur be-safar bhi aata hai
ḳhuda ne husn diya hai tujhe kamal magar
use sajane ka tujh ko hunar bhi aata hai
ye kaun hai ki kahin baiThne nahin deta
uThun to saath mire dar-ba-dar bhi aata hai
‘munir’ sub.h ke Dhalte hi lau lagi chalne
azaab surat-e-bad-e-sahar bhi aata hai
Leave a Reply