Riwaj-O-Rasm Ka Usko Hunar Bhi Aata Hai

rivāj-o-rasm kā us ko hunar bhī aatā hai

mujhe bulātā bhī hai mere ghar bhī aatā hai

badan kā husn damaktā hai raat añdhere meñ

ik āftāb-e-sahar be-sahar bhī aatā hai

judā.iyoñ meñ faqat ghar se dūriyāñ to nahīñ

firāq sūrat-e-dīvār-o-dar bhī aatā hai

mohabbatoñ meñ ghulā jism yaad hai mujh ko

kabhī raqīb mirā mere ghar bhī aatā hai

tire ḳhayāl meñ tere jamāl kā partav

misāl-e-mauj bhī misl-e-guhar bhī aatā hai

faqat ḳhulūs meñ shiddat kī baat hai ya.anī

maqām dil meñ hai aur be-safar bhī aatā hai

ḳhudā ne husn diyā hai tujhe kamāl magar

use sajāne kā tujh ko hunar bhī aatā hai

ye kaun hai ki kahīñ baiThne nahīñ detā

uThūñ to saath mire dar-ba-dar bhī aatā hai

‘munīr’ sub.h ke Dhalte hī lau lagī chalne

azaab surat-e-bād-e-sahar bhī aatā hai

Leave a Comment