Jigar Moradabadi
ehsas-e-ashiqi ne begana kar diya hai
yuun bhi kisi ne aksar divana kar diya hai
ab kya ummid rakkhun ai husn-e-yar tujh se
tu ne to muskura kar divana kar diya hai
tujh se khuda hi samjhe tu ne kisi ko ai dil
mujh se bhi kuchh ziyada divana kar diya hai
phir us ke dekhne ko ankhen taras rahi hain
yadash ba-khair jis ne divana kar diya hai
mujh ko junun se apne shikva jo hai to ye hai
meri mohabbaton ko afsana kar diya hai
ai husn-e-roz afzun umrat daraz baad
donon jahan se mujh ko begana kar diya hai
jab dil men aa gaya hai ik jumbish-e-nazar ne
divana kah diya divana kar diya hai
mujh se hi puchhte hain ye shokhiyan to dekho
mere ‘jigar’ ko kis ne divana kar diya hai
Leave a Reply