Ek Be-Wafa Ko Pyar Kiya Hae Kya Kiya

Behzad Lakhnavi

ik be-vafa ko pyaar kiya haa.e kya kiya

ḳhud dil ko be-qarar kiya haa.e kya kiya

malum tha ki ahd-e-vafa un ka jhuuT hai

is par bhi e’tibar kiya haa.e kya kiya

vo dil ki jis pe qimat-e-kaunain thi nisar

nazr-e-nigah-e-yar kiya haa.e kya kiya

ḳhud ham ne faash faash kiya raz-e-ashiqi

daman ko taar taar kiya haa.e kya kiya

aahen bhi baar baar bharin un ke hijr men

naala bhi baar baar kiya haa.e kya kiya

miTne ka gham nahin hai bas itna malal hi

kyuun tera intizar kiya haa.e kya kiya

ham ne to gham ko siine se apne laga liya

gham ne hamen shikar kiya haa.e kya kiya

sayyad ki raza ye ham aansu na pi sake

uzr-e-gham-bahar kiya haa.e kya kiya

qismat ne aah ham ko ye din bhi dikha diye

qismat pe e’tibar kiya haa.e kya kiya

rangini-e-ḳhayal se kuchh bhi na bach saka

har shai ko pur-bahar kiya haa.e kya kiya

dil ne bhula bhula ke tiri bevafa.iyan

phir ahd ustuvar kiya haa.e kya kiya

un ke sitam bhi sah ke na un se kiya gila

kyuun jabr iḳhtiyar kiya haa.e kya kiya

kafir ki chashm-e-naz pe kya dil-jigar ka zikr

iman tak nisar kiya haa.e kya kiya

kaali ghaTa ke uThte hi tauba na rah saki

tauba pe e’tibar kiya haa.e kya kiya

sham-e-firaq qalb ke daghon ko gin liya

taron ko bhi shumar kiya haa.e kya kiya

‘bahzad’ ki na qadar koi tum ko ho saki

tum ne zalil-o-ḳhvar kya haa.e kya kiya