kisi ka haath daman par kisi ka sar gareban men
ye divane bhi gul-chharre uḌate hain bayaban men
sama kar rah gaya har un ka jalva qalb-e-sozan men
kahan se itni vus.at aa ga.i is tang-daman men
saliqa ḳhaak uḌane ka baḌi mushkil se aata hai
bagule sar paTak kar rah ga.e aḳhir bayaban men
hansi kaliyon ke lab par hai qaba-e-gul ke TukḌe hain
sabhi par chha ga.i divangi ab ke gulistan men
qarib aaya zamana jab bhi ahd-e-gul ki ruḳhsat ka
ulajh kar rah gaya dast-e-junun tar-e-gareban men
suvaida but-kada hai dil haram nazren pujari hain
yahan tafriq bhi kuchh hai to ye hai kufr-o-iman men
iqamat ke liye kya vus.at-e-kaunain kuchh kam thi
abas angḌa.i li tum ne dil-e-nazzara-saman men
jo ankhon se laga.e gul to kanTe rakh liye dil men
mujhe donon hi se ‘qaisar’ ilaqa tha gulistan men
Leave a Reply