duniya samajh rahi hai ki patthar uchhal aa.e
ham apni pyaas ja ke samundar men Daal aa.e
jo phans chubh rahi hai dilon men vo tu nikal
jo paanv men chubhi thi use ham nikal aa.e
kuchh is tarah se zikr-e-tabahi suna.iye
ankhon men ḳhuun aa.e na shishe men baal aa.e
samjho ki zindagi ki vahin shaam ho ga.i
kirdar bechne ka jahan bhi saval aa.e
guzro dayar-e-fikr se ‘mansur’ is tarah
ḳhud par zaval aa.e na fan par zaval aa.e
Leave a Reply