siine men dil hai dil men daagh daagh men soz-o-saz-e-ishq
parda-ba-parda hai nihan parda-nashin ka raz-e-ishq
naaz kabhi niyaz hai aur niyaz naz-e-ishq
khatm hua na ho kabhi silsila-e-daraz-e-ishq
ishq ada-navaz-e-husn husn karishma-saz-e-ishq
aaj se kya azal se hai husn se saz-baz-e-ishq
apni khabar kahan unhen jin pe khula hai raz-e-ishq
saare shuur mit gae jab hua imtiyaz-e-ishq
hosh-o-khirad bhi al-firaqo-baini-va-bainaka kahen
hazrat-e-dil ka khair se hai safar-e-hijaz-e-ishq
pir-e-mughan ke pa-e-naz aur mira sar-e-niyaz
hoti hai mai-kade men rose apni yunhi namaz-e-ishq
hasrat-o-yas-o-arzu shauq ka iqtida karen
kushta-e-gham ki laash par dhuum se ho namaz-e-ishq
ishq ki zaat hi se hai khubi-e-husn-o-shan-e-husn
husn ke dam-qadam se hai saara ye soz-o-saz-e-ishq
ai dil-e-dardmand phir naala ho koi dil-gudaz
suuni padi hai bazm-e-shauq chhed de apna saz-e-ishq
hosh-o-khirad adu-e-ishq ishq hai dushman-e-khirad
hai na hua na ho kabhi aql se saz-baz-e-ishq
‘bedam’-e-khasta hai kahan asl men koi aur hai
zamzama-sanj be-khudi naghma-taraz saz-e-ishq
Leave a Reply