dil ai dil ye tarz nahin kuchh ishq ke ohde-daron ki
sunte ho majburon ki aur kahte ho muḳhtaron ki
phir maujon se chiḳh si uTThi mujh ko to ye dhoka hai
ga.i raat bhi patvaron se ḳhuub nibhi manjdharon ki
yaad dila di hai suraj ke as-pas ik badli ne
kaali qamison ke saa.e men dhuup saped ghararon ki
pipal ke patton ke saa.e kab tak tumhen sarahenge
ek na ik din qismat jaag uThegi rah-guzaron ki
ai gul-e-daman-e-rashk-e-gulistan ham se hamara haal na puchh
sehn-e-chaman ke viranon men surat dekh baharon ki
ik bujhti lakḌi se ik sho.ala lahraya hai jis vaqt
ḳhana-ba-doshon ke ḳheme men baat chhiḌi maTiyaron ki
tere hijr men jaam na khanken patta na khaḌke aah na ho
kis dariya men Duub maren avazen chauki-daron ki
us be-ruḳh ne bedardi se raton raton rulvaya
dard ka had se baḌh jaana Thahri jo dava bimaron ki
aao ik do pal susta len maazi ki divar tale
sej bhi hai nauras kaliyon ki barkha bhi angaron ki
aise kahan nasib hamare bayan ang phaḌak uTThe
kaun ḳhabar hai dukhiya jaag men ham paapi dukhiyaron ki
ham ko kisi se gila nahin hai jaan ga.e pahchan ga.e
viran dilon ke virane hain duniya duniya-daron ki
ek zamana guzra ham bhi tere shahr ke baasi the
aaj bhi ankhon men phirti hai surat tere dayaron ki
go qadmon se juda hue vo rah-guzaren der hui
lekin dil par jam si ga.i hai dhuul in rah-guzaron ki
ḳhair un dinon to chak-garebanon ki izzat hoti thi
aaj to ḳhair se tere shahr men izzat hai dastaron ki
‘ashk’ mire ash.ar ke atish-paron se dhire dhire
basti basti phail rahi hai aanch in ke ruḳhsaron ki
Leave a Reply