Har Ek Lamhe Ki Rag Mein Dard Ka Rishta Dhadakta Hai

har ik lamhe ki rag men dard ka rishta dhadakta hai

vahan taara larazta hai jo yaan patta khadakta hai

Dhake rahte hain gahre abr men batin ke sab manzar

kabhi ik lahza-e-idrak bijli sa kadakta hai

mujhe divana kar deti hai apni maut ki shokhi

koi mujh men rag-e-iz.har ki surat phadakta hai

phir ik din aag lag jaati hai jangal men haqiqat ke

kahin pahle-pahal ik khvab ka shola bhadakta hai

miri nazren hi mere aks ko majruh karti hain

nigahen murtakiz hoti hain aur shisha tadakta hai

Leave a Comment