Aftab Hussain
apna divana bana kar le jaae
kabhi vo aae aur aa kar le jaae
roz buniyad uthata huun nai
roz sailab baha kar le jaae
husn valon men koi aisa ho
jo mujhe mujh se chura kar le jaae
rang-e-rukHsar pe itrao nahin
jaane kab vaqt uda kar le jaae
kise malum kahan kaun kise
apne raste pe laga kar le jaae
‘aftab’ ek to aisa ho kahin
jo hamen apna bana kar le jaae
Leave a Reply