dard ghazal men Dhalne se katrata hai
ḳhali kaghaz meri hansi uḌata hai
kis chahat se qalam pakaḌ kar baiThe the
ab to ek bhi lafz nahin ban aata hai
aḌi-tirchhi lakiron se kab baat bani
shauq andha hai hava pe naqsh banata hai
kis ki sada.en mera ta.aqub karti hain
des nikale shaḳhs ko kaun bulata hai
yaden Tisen si ban kar rah jaati hain
guzra mausam phir kab lauT ke aata hai
kis ka rasta dekh rahe hain ghar ke kivaḌ
suuna suuna angan kise bulata hai
kin kin sahraon ki ḳhaak uḌani paḌi
dil bhi kaise kaise naach bachata hai
jhuTi sachchi jo ji chahe kahte jaao
kaun kisi ke dil men utra jaata hai
vaqt ki baat hai pyare chahe maan na maan
miTha kaḌva sab sunna paḌ jaata hai
mere aage bhaag rahe hain chand ‘riyaz’
mere pichhe mera saaya aata hai
Leave a Reply