milti hai nazar un se to kho jaate hain ham aur
manzil ke qarib aa ke bahakte hain qadam aur
maare hue hain kashmakash-e-vahm-o-yaqin ke
TuuTe hue har but se tarashe hain sanam aur
ye baat samajhte hi nahin hazrat-e-naseh
silta hai agar chaak to khulta hai bharam aur
tadbir ka har naqsh dil-avez hai lekin
hai katib-e-taqdir ka andaz-e-raqam aur
jazbat pe mohren na lagi hain na lagengi
hoti hai zaban band to chalta hai qalam aur
shayad ye sila tark-e-talab ka hai ‘faridi’
baḌhti hi ga.i vus.at-e-daman-karam aur
Leave a Reply