kis karan itne rangon se yaari kis karan ye Dhang
jitne rang bhi chaho ziist men bhar lo maut ka ek hi rang
nam-o-numud se itni duuri Thiik hai lekin aḳhir kyuun
saare jahan se qaus-e-quzah ka rishta apne aap se jang
pal men dhajji dhajji bikharne vaali aisi hai ye ziist
ik se ziyada bachchon ke hathon men jaise kaTi patang
umr bita di apnon aur ghairon ke naqsh banane men
jab apni tasvir banana chahi phike paḌ ga.e rang
main ik likhne vaala mujh ko batana yaar ahmad-‘parvez’
lauh-o-qalam se aage bhi hai kya ye duniya itni tang
Leave a Reply