na vo khizan rahi baaqi na vo bahar rahi
rahi to meri kahani hi yadgar rahi
vahi nazar hai nazar jo bain-hama pasti
sitara-gir rahi kahkashan shikar rahi
shab-e-bahar men taron se khelne vaale
kisi ki aankh bhi shab bhar sitara-bar rahi
tamam umr raha garche main tahi-pahlu
basi hui mire pahlu men bu-e-yar rahi
koi aziiz na thahra hamare dafn ke baad
rahi jo paas to shama sar-e-mazar rahi
vo phuul huun jo khila ho khizan ke mausam men
tamam umr mujhe hasrat-e-bahar rahi
kabhi na bhulengi us shab ki lazzaten ‘akhtar’
ki mere siine pe vo zulf-e-mushk-bar rahi
Leave a Reply