adil-mansuri

Tilismi Ghaar Ka Darwaza

roz aadhi raat ko

ik tilismi ghaar ke

khufiya darvaze ke siine men janam leti hain ghaibi dhadkanen

ghaar ki gahrai men

chalte hue sangit ke qadmon ki chaap

raat ki andhi hava ka haath pakde duur tak jaati hai saath

ek zahri saanp

khinch aata hai sar ki chaah men

laakh khatre hain zara si raah men

band darvaze ke paas

narm bhini ghaas men

baith jaata hai vo kunDli maar ke

aur apna phan uthae

jhumta rahta hai sar ki taan par

khelta rahta hai apni jaan par

tutta hai jis ghadi sar ka bahao

saanp ko aata hai taao

band darvaze pe ghussa men patakta hai vo sar

aur Das leta hai us ko apna zahri phan utha kar

subh hone tak to mar jaata hai darvaza

magar

roz aadhi raat ko

More Poems

Leave a Comment