Ishrat Moin Seemaa
is chashm-e-nam se manzar-e-hairan chala gaya
ḳhvabon ka ik jahan-e-gulistan chala gaya
shahron men aa ke bas ga.e haivan jis ghaḌi
gharon men phir se aaj insan chala gaya
kuchh vasvason men aise kaTi umr-e-be-aman
is zindagi se rishta-e-iqan chala gaya
sharton pe aj-kal to nibhate hain ashiqi
tab hi to chahaton se ye paiman chala gaya
zahid ki kuchh hikayaten sun kar laga mujhe
bas diin rah gaya yahan iman chala gaya
ye dhaḌkanen tumhari to ‘sima’ fareb hain
dil se agar jo jazba-e-ehsan chala gaya
Leave a Reply