apni bahar pe hansne vaalo kitne chaman ḳhashak hue
apne rafu ko ginne vaalo kitne gareban chaak hue
divanon ko kaun batae aaj ki rasm aur aaj ki baat
is ne unhin ki samt nazar ki ishq men jo bebak hue
sho.abada-e-yak tarz-e-karam hai kaisi saza aur kaisi jaza
mauj-e-tabassum jab lahrai tar-daman bhi paak hue
ruḳh dekha jis samt hava ka us janib munh kar ke chale
dasht-e-junun ke divane bhi misl-e-saba chalak hue
ḳhak-e-nasheman jab uḌti hai dil se dhuan sa uThta hai
hadse is gulzar men varna aur bahut ghamnak hue
dekhte dekhte duniya badli gulshan kya virana kya
parbat parbat naqsh the jin ke miTte miTte ḳhaak hue
jan-e-chaman jo gul the ‘aḳhtar’ vo to hue ma.atub o zalil
zeb-e-gulistan raunaq-e-gulshan kal ke ḳhas-o-ḳhashak hue
Leave a Reply