zindagi soz bane saaz na hone paa.e
dil to TuuTe magar avaz na hone paa.e
dard agar shamil-e-avaz na hone paa.e
koi monis koi dam-saz na hone paa.e
jaam se kuchh ko pila kuchh ko nigahon se magar
koi mai-kash nazar-andaz na hone paa.e
lutf jab hai ki rahe ishq sada mahv-e-niyaz
aur is baat pe bhi naaz na hone paa.e
ḳhud ko karna hai junun ke jo havale to ye sun
aql hargiz ḳhalal-andaz na hone paa.e
jis men anjam ka ho ḳhauf sada daman-gir
aise afsane ka aghaz na hone paa.e
ishq aur husn milen mil ke ḳhuda ban jaa.en
gar havas tafraqa-andaz na hone paa.e
ashiyan kunj-e-qafas se bhi giran-tar ho ‘sahar’
gar muavin par-e-parvaz na hone paa.e
Leave a Reply