shikva apne taleon ki na-rasai ka karun
ya gila ai shokh teri bevafai ka karun
vo ki ik muddat talak jis ko bhala kahta raha
aah ab kis munh se zikr us ki burai ka karun
ab-e-zamzam se main dho luun apni peshani ke taiin
dar pe tab us ke irada jabha-sai ka karun
khuub si tambih karna ai judai tu mujhe
gar kisi se phir kabhi qasd ashnai ka karun
gar musakhkhar hove vo khurshid-ru mera ‘bayan’
badshahi kya ki main daava khudai ka karun
Leave a Reply