Tu Nahin Hoga Magar Ye Silsila Rah Jaega

tu nahin hoga magar ye silsila rah ja.ega

tere hone ka tasavvur ja-ba-ja rah ja.ega

qurbaton ki raah se ho kar guzar ja.enge ham

manzilon par darmiyan bas fasla rah ja.ega

kis ne socha tha ki ye itna hasin ik vaqi.a

ek din siine men ban kar hadsa rah ja.ega

rah-e-dil ko raund kar aage nikal ja.enge log

aankh men uThta ghubar-e-qafila rah ja.ega

main kahin kho ja.unga le kar nigah-e-shuq-e-did

tu charagh-e-husn le kar DhunDhta rah ja.ega

kya yunhi ḳhamosh duniya se guzar ja.enge ham

kya jo kahna hai vo sab kuchh an-kaha rah ja.ega

jab kahin kuchh bhi nahin tha bas ḳhuda tha aur phir

jab kahin kuchh bhi na hoga bas ḳhuda rah ja.ega