yuun lag raha hai jaise guman TuTne ko hai
ya.ani haqiqaton ka jahan TuTne ko hai
ḳhvab-o-ḳhayal-o-fikr ki ra.ana.iyan liye
kaghaz pe mera harf-e-bayan TuTne ko hai
jab is ke baad da.imi ik ghar hai muntazir
kya gham jo aarzi sa makan TuTne ko hai
jo faisla hua hai adalat men haq taraf
hairan aql hai ye zaban TuTne ko hai
paḌh kar jadid sha.iri ye fa.eda hua
uslub apna apna bayan TuTne ko hai
dekho kinare apne sambhale raho miyan
jaari jo hai ye sail-e-ravan TuTne ko hai
ab kaun hoga apne nishane ki zad pe yaan
ab tiir kya karenge kaman TuTne ko hai
ab us ko aise chhoḌna achchha nahin miyan
kuchh ho ḳhayal pir-e-mughan TuTne ko hai
bardasht ki bhi koi to had hoti hai ‘obaid’
ab is se aage band-e-fughan TuTne ko hai
Leave a Reply