Bharat Bhushan Pant
sachcha.iyon ko bar-sar-e-paikar chhoḌ kar
ham aa ga.e hain dasht men ghar-bar chhoḌ kar
ankhon men jagte hue ḳhvabon ka kya karen
ninden chali ga.iin hamen bedar chhoḌ kar
ham be-ḳhudi men kaun si manzil pe aa ga.e
Thahra hua hai vaqt bhi raftar chhoḌ kar
sahil kise bata.e yahan apne dil ka dard
maujen chali ga.iin use har baar chhoḌ kar
lazim nahin ki aql ki har baat Thiik ho
ab maan lo jo dil kahe takrar chhoḌ kar
is ke siva ab aur to pahchan kuchh nahin
ja.un kahan main apna ye kirdar chhoḌ kar
shayad isi malal men vo dhuup Dhal ga.i
saaya chala gaya kahin divar chhoḌ kar
ab vadi-e-ḳhayal men tanha khaḌa huun main
jaane kahan ga.e mujhe ash.ar chhoḌ kar
Leave a Reply