fasle hain sadiyon ke aur zindagi tanha
dard-e-sar do-alam ka ek aadmi tanha
sho.ala-e-havadis ne hausla diya varna
bujh ke rah ga.i hoti sham-e-zindagi tanha
zindagi men amezish un ki rang bharti hai
dosti hi kaam aa.e aur na dushmani tanha
puchhta hai kab koi haal in charaghon ka
raushni dikhate hain jo gali gali tanha
thi nafas nafas ḳhushbu tha nazar nazar chehra
din guzar gaya tanha raat kaT ga.i tanha
teri parsa.i ka rah gaya bharam vaa.iz
jurm hai magar nadan shaghl-e-mai-kashi tanha
guzre aise lamhe bhi mujh pe barha ‘at.har’
main ne ḳhud ko paaya hai anjuman men bhi tanha
Leave a Reply