darmiyan-e-gunah-o-savab aadmi
hai ḳhud apne liye hi azaab aadmi
ye zamin jis ḳhata ki bani thi saza
main vahi to huun ḳhana-ḳharab aadmi
hal muamme ka jaise muamma koi
bas ki hai aadmi ka javab aadmi
dekh be-saḳhta aks ghabra gaya
shishe ke samne be-hijab aadmi
falsafa bhi ḳhudi falsafi bhi ḳhudi
aap talib hai aap hi kitab aadmi
hashiya hai kabhi aur kabhi rang hai
jaise jaam aadmi aur sharab aadmi
maut de bhi ga.i hai javab-e-azal
aur khaḌa rah gaya la-javab aadmi
mujh se jal-thal hua hai mira andarun
main ne kar hi diya be-naqab aadmi
Leave a Reply