Akhtar Saeed Khan
zindagi kya hue vo apne zamane vaale
yaad aate hain bahut dil ko dukhane vaale
raste chup hain nasim-e-sahari bhi chup hai
jaane kis samt ga.e Thokaren khane vaale
ajnabi ban ke na mil umr-e-gurezan ham se
the kabhi ham bhi tire naaz uThane vaale
aa ki main dekh luun khoya hua chehra apna
mujh se chhup kar miri tasvir banane vaale
ham to ik din na jiye apni ḳhushi se ai dil
aur honge tire ehsan uThane vaale
dil se uThte hue sho.alon ko kahan le jaa.en
apne har zaḳhm ko pahlu men chhupane vaale
nik.hat-e-sub.h-e-chaman bhuul na jaana ki tujhe
the hamin niind se har roz jagane vaale
hans ke ab dekhte hain chak-e-gareban mera
apne aansu mire daman men chhupane vaale
kis se puchhun ye siyah raat kaTegi kis din
so ga.e ja ke kahan ḳhvab dikhane vaale
har qadam duur hui jaati hai manzil ham se
rah-e-gum-karda hain ḳhud raah dikhane vaale
ab jo rote hain mire hal-e-zabun par ‘aḳhtar’
kal yahi the mujhe hans hans ke rulane vaale
Leave a Reply