Rasheed Lakhnavi
jo mujhe marghub ho vo sogvari chahiye
mere soyam men tumhen poshak bhari chahiye
taaza ho bagh-e-tamanna abiyari chahiye
aaj to ai chashm-e-tar kuchh ashk-bari chahiye
jab bahar aa.e to kab parhez-gari chahiye
sal-bhar men chaar din to bada-ḳhvari chahiye
dil jigar se jab main kahta huun nahin aa.ega yaar
kahte hain kuchh der to aur intizari chahiye
hon havas-o-hosh agar baaqi to kya lutf-e-junun
dil na qaabu men ho vo be-aḳhtyari chahiye
raas aa.e tum ko mulk-e-ishq ki ab-o-hava
ashiqo har-vaqt shaghl-e-ah-o-zari chahiye
vasl ki shab hai vo pahlu men hain to sone na de
haan mire dil ab ziyada be-qarari chahiye
maut bekar aati hai marna hamara hai muhal
aap ki talvar ka ik zaḳhm kaari chahiye
rote rote mar ga.e hain jo firaq-e-yar men
un ko bahr-e-ghusl mayyat ab-e-jari chahiye
sikhi un se dilruba.i aa ga.i fasl-e-shabab
aj-kal dil ki taraf se hoshiyari chahiye
sar na uTThe teri chaukhaT se na kuche se qadam
tauq bhari chahiye zanjir bhari chahiye
ho ziyada raushni aur der tak baaqi rahe
meri sham-e-ruh ko mahfil tumhari chahiye
aap ke lao-ni.am ne turfa dikhlaya tilism
na-umidi kahti hai ummid-vari chahiye
tere chehre ke muqabil ho agar to is tarah
aftab-e-hashr ko a.ina-dari chahiye
ye tumhari ja nahin ankhon ke va se hain ye dar
dil men duun tum ko jagah ye parda-dari chahiye
baḳhsh deta hai ‘rashid’ allah itni baat par
kar ke isyan aadmi ko sharmsari chahiye
Leave a Reply