ise bhi chhoḌun use bhi chhoḌun tumhen sabhi se hi mas.ala hai?
miri samajh se to bala-tar hai ye pyaar hai ya muahida hai
”jo tu nahin thi to aur bhi the jo tu na hogi to aur honge”
kisi ke dil ko jala ke kahte ho meri jaan ye muhavara hai
ham aaj qaus-e-quzah ke manind ek duuje pe khil rahe hain
mujhe to pahle se lag raha tha ye asmanon ka silsila hai
vo apne apne tamam sathi, tamam mahbub le ke aa.en
to mere hathon men haath de de hamen bhi izn-e-mubahla hai
are o jao!! yuun sar na khao!! hamara us se muqabla kyaa?
na vo zahin-o-fatin yaaro na vo hasin hai na sha.era hai
Leave a Reply