Poet
dil-jhil men phenka hai tiri yaad ne patthar
sar se na guzar jaa.e koi mauj ubhar kar
ye phuul se ruḳh sarv se qad chand se paikar
halchal si macha dete hain jazbat ke andar
kuchh aur sitam aur sitam ai gham-e-dauran
khulte hain baḌi der men insan ke jauhar
tu paas bhi itna ki tujhe dekh na pa.un
tu duur bhi itna ki miri soch se bahar
main kaun si manzil ke liye garm-e-safar huun
chalta nahin koi bhi mire naqsh-e-qadam par
ik tu ki tira ek hi rishta hai jahan men
ik main ki mire sainkaḌon rishte hain zamin par
insan ka safar su-e-qamar ḳhuub hai lekin
fitne na uTha.e ye kahin chand men ja kar
ai sub.h-e-tarab aa miri ankhon men sama ja
maghmum na kar jaa.en tujhe shaam ke manzar
kab tak vo kira.e ke makanon men rahenge
‘nusrat’ jo bana sakte nahin apne liye ghar
Leave a Reply