Zubair Qaisar
kahin se aaya tumhara ḳhayal vaise hi
ghazal ka hona hua hai kamal vaise hi
hamare husn-e-nazar ka kamal kuchh bhi nahin
to kya tumhara hai saara jamal vaise hi
tira visal ki jis taur mere bas men nahin
hua hai hijr men jiina muhal vaise hi
tira javab mire kaam ka nahin hai ab
ki main to bhuul chuka huun saval vaise hi
kaha ye kis ne ki ukta gaya junun se main
paḌa huun dasht men ab to niDhal vaise hi
uchhalta hai jaziron ko jis tarah ai bahr
miri bhi laash ko tah se uchhal vaise hi
nikalta hai tu jis taur raat se suraj
hamari shab se hamen bhi nikal vaise hi
Leave a Reply