Shahzad Ahmad
vo ja chuka hai to kyuun be-qarar itne ho
mohabbat us se karo jis ko bhuul sakte ho
nishan-e-manzil-e-jan gar nahin mila na sahi
chalo safar to kiya hai kahin to pahunche ho
tamam umr na milne ka hausla hi sahi
tum apne dil men koi aarzu to rakhte ho
safar bhi tum ne kiya aftab ki surat
abhi tak apne hi naqsh-e-qadam pe chalte ho
jo raushni hai dilon men ata tumhari hai
charag tum sa nahin tum charag jaise ho
dilon ke so.e hue gham abhi to jaage hain
zara si der to baiTho abhi to aa.e ho
tumhare lahje ka ye zer-o-bam qayamat hai
kabhi rafiq kabhi na-shanas lagte ho
ḳhuda suna hai rag-e-jan ke paas rahta hai
magar tum aur bhi nazdik aate jaate ho
tamam din rahi saa.e ki justuju ‘shahzad’
hui hai raat to ankhen talash karte ho
Leave a Reply