Iliyas Babar Aawan
ghamon ki bhiiḌ men rasta bana ke chalta huun
ali ki aal huun main sar uTha ke chalta huun
zara sambhal ke mire raste men tum aana
main apne ghar se lahu aazma ke chalta huun
ye tera shahr miri saans chhin leta hai
main apne gaanv men siina phula ke chalta huun
jo meri raah men patthar gira ke jaata hai
main us ki raah se patthar haTa ke chalta huun
hamesha ḳhair se pahuncha huun apni manzil par
safar se pahle main kuchh de dila ke chalta huun
Leave a Reply