husn be-parda hai jalva aam hai
dekhna ahl-e-nazar ka kaam hai
kuchh nahin hota ba-juz hukm-e-ḳhuda
aadmi to muft men badnam hai
ab ḳhuda baḳhshe na baḳhshe kya karun
dil to mera banda-e-asnam hai
dekhiye chaliye nazare raah ke
ye safar bas aur do ik gaam hai
ham-nashino ab to mere vaste
zindagi TuuTa hua ik jaam hai
dard bhi kuchh dab gaya hai dil ke saath
‘nur’ is karvaT bahut aram hai
Leave a Reply