Jin Dinon Lafzon Mein Aks-E-surKHi-E-ruKHsar Tha

jin dinoñ lafzoñ meñ aks-e-surḳhī-e-ruḳhsār thā

merī taḳhlīqāt kā har naqsh ik shahkār thā

dil tujhe pā kar bhī terī justujū kartā rahā

tere dīvāne ko jaane tujh se kaisā pyaar thā

kyuuñ samajhtā ḳhud ko tanhā zindagī ke dasht meñ

aap hī meñ kārvāñ thā aap hī sālār thā

jazba-o-ehsās mere ham-safar the dosto

zindagī kā rāsta kaise kahūñ dushvār thā

kaise maiñ bāhar nikaltā ab ke mela dekhne

mere andar jab lagā ik dard kā tyauhār thā

kis jagah kis daur meñ yūsuf nahīñ bikte rahe

misr ke bāzār se kam kaun sā bāzār thā

yuuñ to dīvāreñ bahut thiiñ shahr meñ ‘shāhid’ magar

sar pe yuuñ sūraj thā anqā sāya-e-dīvār thā

Leave a Comment