Poet
jin dinon lafzon men aks-e-surḳhi-e-ruḳhsar tha
meri taḳhliqat ka har naqsh ik shahkar tha
dil tujhe pa kar bhi teri justuju karta raha
tere divane ko jaane tujh se kaisa pyaar tha
kyuun samajhta ḳhud ko tanha zindagi ke dasht men
aap hi men karvan tha aap hi salar tha
jazba-o-ehsas mere ham-safar the dosto
zindagi ka rasta kaise kahun dushvar tha
kaise main bahar nikalta ab ke mela dekhne
mere andar jab laga ik dard ka tyauhar tha
kis jagah kis daur men yusuf nahin bikte rahe
misr ke bazar se kam kaun sa bazar tha
yuun to divaren bahut thiin shahr men ‘shahid’ magar
sar pe yuun suraj tha anqa saya-e-divar tha
Leave a Reply