raat angan men chand utra tha
tum mile the ki ḳhvab dekha tha
ab ki ḳhud hain hisar-e-zat men band
varna apna bhi zor chalta tha
shisha-e-dil pe aisi choT paḌi
ek lamhe men reza reza tha
us ke kuche ke ho liye varna
rasta har taraf nikalta tha
rut jo badli to ye bhi dekh liya
patta patta zamin pe bikhra tha
ek ḳhushbu hai jaani pahchani
is ḳharabe men kaun rahta hai
mom ki tarah vo pighal sa gaya
vo jo patthar ki tarah lagta tha
ab ki sunte nahin ho baat magar
phir kahoge ki koi kahta tha
raat sunsan thi magar ‘nadir’
hashr sa dil men ek barpa tha
Leave a Reply