phuT Chuki Hain Subh Ki Kirnen Suraj chaDhta Jaega

phuuT chukī haiñ sub.h kī kirneñ sūraj chaḌhtā jā.egā

raat to ḳhud martī hai sitāro tum ko kaun bachā.egā

jo zarra jantā meñ rahegā vo taarā ban jā.egā

jo sūraj un ko bhūlegā vo āḳhir bujh jā.egā

tanhā tanhā ro lene se kuchh na banegā kuchh na banā

mil-jul kar āvāz uThāo parbat bhī hil jā.egā

maanā aaj kaḌā pahrā hai ham biphre insānoñ par

lekin socho tinkā kab tak tūfāñ ko Thahrā.egā

kyuuñ chintā zanjīroñ kī hathkaḌiyoñ se Darnā kaisā

tum añgāra ban jaao lohā ḳhud hī gal jā.egā

jantā kī āvāz dabā de ye hai kis ke bas kī baat

har vo shīsha TūTegā jo patthar se Takrā.egā

pūñjī-patiyoñ yaad rakho vo din bhī ab kuchh duur nahīñ

band tijorī meñ har sikka añgāra ban jā.egā

dukh meñ ronā-dhonā kaisā mūrakh insāñ hosh meñ aa

tū is bhaTTī meñ tap-tap kar kundan bantā jā.egā

tan ke nāsūroñ ko ujle kapḌoñ se Dhāñpā lekin

kis parde meñ le jā kar tū man kā koḌh chhupā.egā

kis ne samjhā hai Dhalte sūraj kā ye sandesh yahāñ

jo bhī bol baḌā bolegā ik din muñh kī khā.egā

Leave a Comment