Husn Par Dastaras Ki Baat Na Kar

husn par dastaras kī baat na kar

ye havas hai havas kī baat na kar

pūchh agle baras meñ kyā hogā

mujh se pichhle baras kī baat na kar

ye batā haal kyā hai lākhoñ kā

mujh se do chaar das kī baat na kar

ye batā qāfile pe kyā guzrī

mahaz bāñg-e-jaras kī baat na kar

ishq-e-jān āfrīñ kā haal sunā

husn-e-īsā nafas kī baat na kar

ye batā ‘arsh’ soz hai kitnā

saaz par dastaras kī baat na kar

Leave a Comment