ye chand jo bachchon ka khilauna hai miri dost
kho ja.ega is baat ka rona hai miri dost
ye zardi-e-ruḳhsar na miTTi men milegi
ye zardi-e-ruḳhsar to sona hai miri dost
chal baagh men rote hain gulabon se lipaT kar
ghar men bhi to takiya hi bhigona hai miri dost
maujud bhi aise huun ki maujud nahin huun
sabit mire hone se na hona hai miri dost
dharti ne bhi sote men hamen zaḳhm diye hain
ye sej bhi kanTon ka bichhauna hai miri dost
auron ki tarah mujh se bichhaḌ ja.ega vo bhi
hona hai kisi roz ye hona hai miri dost
Leave a Reply