ye soch kar na phir kabhi tujh ko pukara dost
dushman ka dost ho nahin sakta hamara dost
ham ne kabhi rakha hi nahin hai hisab-e-ishq
tu hi hamara nafa hai tu hi khasara dost
ankhon ka ik hujum laga hai magar ye dil
bhula na aaj tak tira pahla ishara dost
sab ko hai apni apni gharaz se gharaz yahan
koi hamara dost na koi tumhara dost
jo kuchh azal se hota raha hai vahi hua
ham ko bhi doston ki adavat ne maara dost
chahe tu e’tiraf kare ya nahin kare
‘ruhi’ baghair hai nahin tera guzara dost
Leave a Reply