Kishwar Naheed
tujh se vaada aziz-tar rakkha
vahshaton ko bhi apne ghar rakkha
apni be-chehragi chhupane ko
aine ko idhar udhar rakkha
ik tira gham hi apni daulat thi
dil men poshida be-khatar rakkha
aarzu ne kamal pahchana
aur taalluq ko taaq par rakkha
is qadar tha udaas mausam-e-gul
ham ne ab-e-ravan pe sar rakkha
apni varaftagi chhupane ko
shauq ne ham ko dar-ba-dar rakkha
kalma-e-shukr ki mohabbat ne
ham ko tamhid-e-khvab par rakkha
un ko samjhane apna harf-e-sukhan
ansuon ko payam par rakkha
Leave a Reply