rahe dariya-e-suḳhan yunhi ravan mere ba.ad
banjh ho jaa.e na ghalib ki zaban mere ba.ad
kaun dega unhen ḳhushbu ka jahan mere ba.ad
kis se lipTenge ye nazuk-badnan mere ba.ad
ku-ba-ku phirti hai ab charon-taraf avara
bu-e-gul ko na mili ja-e-aman mere ba.ad
laakh main nang-e-suḳhan huun pa yaqin hai mujh ko
log DhunDenge mira tarz-e-bayan mere ba.ad
chhoḌ kar ja.unga main ghar men ujale ka subut
kaam aa.ega ye taqon ka dhuan mere ba.ad
yaar sab chal diye bazar-e-havas ki janib
ho ga.i rah-e-junun kam-guzaran mere ba.ad
main ki ḳhatam bhi huun ḳhud apni tabi.at ka ‘ziya’
qat hua silsila-e-ah-o-fughan mere ba.ad
Leave a Reply